logo

በአስቸጋሪ ህይወት ዉስጥ ለሚገኙ 6 አቅመ ደካሞች መኖሪያ ቤት ሰርቶ ለማስረከብ እንቅስቃሴ መጀመሩን የአሶሳ ዩኒቨርሲቲ አስታወቀ፡፡

በአስቸጋሪ ህይወት ዉስጥ ለሚገኙ 6 አቅመ ደካሞች መኖሪያ ቤት ሰርቶ ለማስረከብ እንቅስቃሴ መጀመሩን የአሶሳ ዩኒቨርሲቲ አስታወቀ፡፡ (የቤኒሻንጉል ጉሙዝ ክልል ብዙኃን መገናኛ ድርጅት፣23/2012)የቤት ግንባታዉን በይፋ ያስጀመሩት የአሶሳ ዩኒቨርሲቲ ፕሬዚዳንት ዶክተር ከማል አብዱረሂም ዩኒቨርሲቲያቸዉ በማህበረሰብ አገልግሎት ዘርፍ በተለያዩ ጊዜያት ሰፊ ስራዎችን እየሰራ እንደሚገኝ ጠቅሰዉ በአሁኑ ሰዓት ደጋፊ የሌላቸዉና በተለያየ ደረጃ ችግር ዉስጥ ለሚገኙ 6 አባወራዎች ቤት ገንብቶ ለማስረከብ 5 መቶ ሺህ ብር ያህል በጀት ይዘዉ ወደ ስራ መግባታቸዉን ተናግረዋል፡፡ ከዚህ ቀደም በዩኒቨርቲዉ አቅራቢያ ላይ ለሚገኘዉ የአምባ 8 ቀበሌ ማህረሰብ በ1 ነጥ 2 ሚሊየን ብር የመብራት አገልግሎትና በ6 መቶ ሺህ ብር ወጪ የንፁህ መጠጥ ዉሃ እንዲያገኙ ማድረጉን ያስታወሱት ፕሬዚዳንቱ በአሁኑ ሰዓትም በአሶሳ ከተማ 4 እና በአጎራባች አጉሻ ቀበሌ 2 በድምሩ 6 የከፋ ችግር ዉስጥ ለሚገኙ ወገኖች መጠለያ ቤት ሰርተዉ ለመስጠት እየተንቀሳቀሱ መሆኑን ገልፀዋል፡፡ ዩኒቨርሲቲዉ በማህበረሰብ አገልግሎት ዘርፍ በአለፈዉ ዓመት በራሳቸዉ አቅም መማር ለማይችሉ 1 ሺህ ተማሪዎች የትምህርት ቁሳቁስና መሰል ድጋፎችን ማድረጉን ጠቅሰዉ በቀጣይም ለ1 ሺህ 5 መቶ ተማሪዎች መሰል ድጋፍ ለማድረግ መዘጋጀታቸዉን አስረድተዋል፡፡ ከዚህም ባሻገር በቅርቡ የተከሰተዉን የኮሮና ወረርሽኝ ለመከላከል ከ10 ሚሊየን ብር በላይ ወጪ በመመደብ እየተንቀሳቀሱ እንደሚገኝ የገለፁት ፕሬዚዳንቱ በቀጣይም ለአምባ 3 ቀበሌ መንገድና ድልድይ የመስራትና በሌሎች አካባቢዎችም መሰል የማህበረሰብ አገልግሎት ስራዎችን የመስራት እቅድ እንዳላቸዉም ተናግረዋል፡፡ በዩኒቨርሲቲዉ የቤት ግንባታ የተጀመረላቸዉ አቅመ ደካሞችም በአሁኑ ሰዓት በከፍተኛ ችግር ዉስጥ እንደሚገኙ ገልፀዉ የአሶሳ ዩኒቨርሲቲ ባልጠበቁት ሁኔታ ከምንም በላይ መሰረታዊ የሆነዉን መጠለያ ገንብቶ ለመስጠት የጀመረዉ ተግባር በእጅጉ የሚያስመሰግንና ለወገን ደራሽነቱን ያረጋገጠበት ነዉ ብለዋል፡፡ በእድሜ መግፋትና በተለያዩ ምክንያቶች የእለት ህይወታቸዉን መምራት ተስኗቸዉ የሰዉ እጅ ለማየት በቅተናል ያሉት አስተያየት ሰጪዎቹ የነበሩበትን ሁኔታ ተመልክቶ የቤት ባለቤት ሊያደርጋቸዉ ለመጣዉ የአሶሳ ዩኒቨርሲቲ ልባዊ ምስጋናቸዉን አቅርበዋል፡፡ የዘገበዉ ባልደረባችን ሙሉቀን ባልቻ ነዉ፡፡

Image

Leave comment